Świętochłowice - Forum bez polityki

Idzie to tyż posuchać na www.ojgyn.blog.onet.pl

Nó, tóż mómy już chnet tyn faszing, tyn karnewal zbyte, pójńdzie ci to wszyjsko forbaj... aże na bezrok. Jesce ino musicie szczimać (jô niy, bo nikaj sie niy wybiyróm) tónkanie harynka we wtorek i zatym popiylcowô strzoda. I tak ci sie miarkuja, co niy byda łozprawiôł jak kôżdyrok ło tyj popiylcowyj strzodzie, bo same miarkujecie, co to jes i pewnikym jôch by nic nowego Wóm, moje roztomiyłe suchocze, niy padziôł. A iże to już na isto za trzi dni łostatek karnewalu, to spómna ino cosik coch już dôwno kiejsik łozprawiôł, ale zawdy mi to jakosik po palicy sie belónce po tych naszych karnewalowych prziwykach, po tym bajzlowaniu we łóńskô sobota (a i terôzki we wtorek) i po tym tym łostatku latośnego faszingu. Tak sie medikuja, iże tyż żôdnymu niy ciepło sie na palica, żôdyn niy prziszôł ło gowa, kiej uwidziôł we telewizyji tyn moc wywołany karnewal we Rio. Cowiek rôd zaziyrôł na te gryfnie poseblykane czôrne dziołchy ze blank sagimi cyckami (a te łogiby !!!) tym tuplym, iże za łoknym ci u nôs – tak jak i we tyj Brazyliji – śniega niy bóło. A tam we tym Rio to ci sie ale bawiyli. Mój kamrat kiejsik tak po śtyruch sznapsach, łozmarzóny, łozblyndzóny choby jóngfera przi pôłni miesiónczka, wyszłeptôł mi we kaczmie u Pyjtra:
– Wiysz Ojgyn! Tak bych kciôł jesce rółz pofurgnóńć do tyj Brazyliji, do tego ci Rio, na tyn łostatek faszingu, na tyn karnewal we Rio...
– Niy gôdej? Jesce rółz byś tam sie kciół pokulwitać? A bółeś tam już skorzij?
– Niy, niy bółech alech... już rôz kciôł tam być!!!
Tyn brazilijski karnewal to taki wybuchowy miszóng muzyki, tańcowaniô, zeksu i... morza gorzôły. Tego niy ma nikaj na świycie. Nałónczôs tych pôruch dni blank zamiyrô ci nórmalne życie. Brazyliô to taki ci kraj, ftory żyje dlô i do grómady ze karnewalu. Napoczynô sie tyn rómraj we pióntek skorzij strzody popiylcowyj (latoś dwadziestego łósmego lutego). We tyn dziyń włódze Rio dôwajóm klucze łod miasta Królowi Momo i łón tym wszyjskim reskiyruje aże do strzody na rozwidnioku, i beztóż tyż mocka tych ludzi, kierzi bez te pôrã dni fajrowali, pyndaluje direkt ze tańcowaniô do kościoła, coby jim tameszne kapelónki (tak jak u nôs) posuli hasiym palice. Spółczysny faszing brazylijski narodziół sie kajsik we 1845 roku. Nôjbarzij majyntne, pijynżne miyszkańce miasta uzdali – na szimel Paryża – zorganizjyrować tam we Rio de Janeiro we skorzij Srogigo Postu, côłkô zeryjô balów, maskynbalów, maskynfestów we zawrzitych zolach. Ale już na bezrok tyn ichni karnewal wylôł sie na hulice i tak ci już gryfniście do dzisiej łostało.
Majóm ci tam te Brazilijôki mocka roztomajtych prziwyków skuplowanych ze tym faszingym. Jedyn śnich to „blokos” (blokersi łod ynglickigo słówecka blocks). Sóm to nôjczyńścij sómsiady ze jednyj hulicy abo przedmiyścia, kierzi sóm jednako łoblecóne i do grómady trajniyrujóm bez côłki rok tańcowanie ichnij samby. Jejich parady idzie pódziwiać niy ino we samym Rio ale i we takich miyjscach jak: Copacabana, Ipanema, Lagoa i cheba nôjbarzij wywołano Suvaco de Christo, co po naszymu znacy: „Parza Krystusa”. Ta côłko hormijô „blocos” wystympuje u podnóża wzniysiyniô, na kierym styrcy tyn wywołany dynkmal Krystusa Zbawiciyla, tyn zimbol Rio de Janeiro.
Szłoby sam jesce mocka łozprawiać i gôwyndzić (choby i ło takim latośnym karnewalu we Meinz, ło kierym mi łozprawiôł tameszny kamrat), ale mómy już przeca srogi post łod prziszłyj strzody i niy byda sam terôzki Wóm przi tym poście robiół smacyska na niydozwólóne i fest zaszperowane uciychy, prôwda? I chobych niy kciôł, to na isto musza (kuknijcie jak to fónguje: niy kca, ale musza!) dopedzieć sam jesce jedne. Łod strzody 26 lutego do dziesiej zetwô we Hawanie na Kubie szykownisty Miyndzynarodowy Festiwal Kubańskigo Cigara (Festival del Habano 2014). Tela, co to tyż ci juzaś jes blank inkszô bôjka, a jô sam niy byda namôwiôł do kurzyniô tych cigarów chocia... ja, ja... miôłech ci je kiejsik festelnie rôd. Styknie co rzykna, iże latoś jes ci tam bezmać na Kubie, we Hawanie bez piyńć tysiyncy miyłośników cigarów: „Montecristo”, „Cohiba”, „Partagas” i inkszych jesce, ze chnet dziewiyńćdziesiyńciuch krajów świata. Ale to jes daleko, a sam mómy pierónym licho latoś zima. Eźli to jes zima, to jô bych sie za tela niy wadziół, ale kiej i we Soczi mieli utropa ze śniygym, to nasze utropy sóm jak miteser na fresie.

_________________
Ojgyn z Pnioków