| Świętochłowice - Forum bez polityki https://swietochlowice.biz/forum/ |
|
| Darymny futer... https://swietochlowice.biz/forum/viewtopic.php?f=17&t=597 |
Strona 1 z 1 |
| Autor: | Ojgyn z Pnioków [ 11 lis 2015, 14:50 ] |
| Tytuł: | Darymny futer... |
Idzie to tyż posuchać na www.ojgyn.blog.onet.pl Pojstrzodek nocy, dziepiyro pizło dwanŏście. Na prykolu śpiōm starŏ ze starym a chyrczōm, choby kcieli dwa kubiki drywna zerżnōńć. Chrrr, chrrr, chrrr.... A sam łotwiyrajōm sie dźwiyrka ze kilszranku i wylazuje śniego srogŏ mysz. Dupnŏ choby kormik. Wylazuje takŏ ździebko bamōntnŏ, we jednyj gracy dziyrżi kranc wusztu, we drugij paket biksōw biyru, we rugzaku na plecyskach mŏ jesce nafolowane jakesik paksliki szmiyrkyjzy, rola hauzkyjzy i ajnfachowŏ kyjza we talarkach. Usiotanŏ, zafucanŏ deptŏ tak polekuśku, opaternie nŏjprzodzij bez kuchyń, siyń i terŏzki bez izba, kaj nynajōm te starziki. A sam chrrr, chrrrr, chrrr.... choby we zajgwerku... chrrr, chrrr, chrrr ... Ta mysz deptŏ dalszij aże dokwanckała sie do swojij dziury, do tyj dukli kaj bez dziyń sie nynała. Jesce ino kukła do zadku i za kwilka zaziyrŏ a sam blank przi jeji dziurze postawiōnŏ jes szłapka a driny na wŏbik kōnścineczek szpeku... taki, Wiycie, choby sie fto pazurska połobrzinŏł. Maluśkŏ szpyrecka, pewnikiym fest szporobliwe te starziki byli. A sam dalszij, możno bali i barzij... chrrr, chrrrr, chrrrr.... Ta mysz sie tak zniynŏgła łobrōciōła do zadku... chrrr, chrrr, chrrr..... K..wa! Jak dziecka! Blank jak dziecka! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|