| Świętochłowice - Forum bez polityki https://swietochlowice.biz/forum/ |
|
| Jakech kejsik zacióngoł... https://swietochlowice.biz/forum/viewtopic.php?f=17&t=665 |
Strona 1 z 1 |
| Autor: | Ojgyn z Pnioków [ 03 kwie 2016, 8:02 ] |
| Tytuł: | Jakech kejsik zacióngoł... |
Idzie to tyż posuchać na www.ojgyn.blog.onet.pl Wiycie! Chopy we mojich latach, tak miyndzy szejśdziesiōnt a siedymdziesiōnt lŏt stare nŏjczyńścij, zaobycz we szynku przi ladze biyru, napoczynajōm gŏdać, łozprawiać ło... warzyniu. Ja, ja, to terŏzki je miyndzy chopami, i to niy ino tymi zwiykowanymi, we mōłdzie. Kej już same wysłepiōm pŏra lagōw biyru i ku tymu jesce szluknōm pŏra sznapsōw, napoczynŏ sie kwŏlba jake to śnich sōm kuchŏrze na miara „master szefōw” takich jak: Jamie Olivier, Gordon Ramsay abo chocia Karol Okrasa. Ło Gesslerce niy byda sam spōminŏł, bo tego flapsu pomelanego ze kudłami, co uwarzi ta spaśnŏ kucharyjŏ łod tych „rewolucyjōw”, to bych na isto do gymby niy wziōn. Kejsik, możno jak byli ze dwadzieścia kilo modsze, to jesce moc łozprawiali ło babach, ło tym wiela i jake we modych latach zarachowali (abo łōnym sie zdało, co zarachowali) i asiyli sie wiela to tyż kŏżdy śnich poradziōł we tych modych latach wysłepać gorzŏły. – Jŏ, to tak jesce dwa-trzi lata tymu nazŏd poradziōł wyduldać szejś cyjntli za rajōm, i to krōm biyru ku tymu. – Asi sie ruby Lyjo-gwiŏździŏrz, jak to gorole gŏdajōm: „astrōnōm”, kerymu sie ciyngym tyn nasz „wszechświat” łozszyrzŏ. – Ja, ja, pamiyntōm jakeś śtyry lata tymu nazŏd przi Zilwestrze wysłepŏł śtyry sznapsy i prasknōłeś na zol jak bela sztofu na arbajtancugi! – krōtko fasnōł gŏdka rubego Lyjoka Hanzlik szoferŏk. Juzaś jedyn ze naszych kamratōw, Maniuś Ukrainiec, mŏ zawdy na isto mocka roztomajtych gyszichtōw do łopedzyniŏ (prŏwdziwych abo do łostatka lipnych bajerōw) nale chnet blank niy gŏdŏ ło babach. Możebne, iże to skuli tego, co jejigo babeczka robi za masarza i kejby sie tak czegosik ło inkszych babach dowiedziała, to by mu te jego basisko pitwokym pochlastała. Ale rōłz cosik spōmniŏł, cosik tam napocznōł bez cweku łozprawiać, tela co wszyjsko mu pometlŏł Yjduś, ftory te łōnego łozprŏwki już słyszŏł i tak ci skwitōwŏł: – Maniuś dej pozōr ze tymi twojimi kwŏlbami ło zŏlyckach do inkszych babōw, bo ci zarŏzki przipōmna jakeś to kejsik po gorzŏle przed jednōm Murzinkōm pitŏł; śmiatŏłeś chobyś dziobła uwidziŏł. Cŏłke twoje kamractwo mało do galot niy najscało przi tyj przileżitōści. Nō, i jakosik ci gŏdka po tym sztichu napoczła chrōmać, splŏtać, i – coby niy bōło jakijsik haje – jŏch napocznōł łozprawiać swoja gyszichta po tym, jakech wrōłz łobsztalowŏł kolyjnŏ laga gorzŏły i biyru. – Wiycie chopy. Mie ci sie przitrefiōł kejsik taki cufal. Jakesik dwadzieścia lōt tymu nazŏd poszŏłech – jak to miŏłech we zwyku – do jednygo katowskigo kafyju Europa, kaj zawdy po połedniu grała muzyka i szło kŏżdydziyń jakosik cudzŏ frela, nō, niy ino frela, nale baba samotnŏ abo i wydanŏ przigŏdać i do łostatka zbałamōńcić. Blank trzyźby zicnōłech przi tiszu wele łokna i po lekuśku napocznōłech kukać, łobziyrać sie naobkoło; nō, kciŏłech łobadać jake tyż to dziołchy przikulwitali sie dzisiŏj do tego kafyju na tańcowanie. Za tela niy bōło co łoglōndać i ino żech przifilowŏł jedna takŏ poblisku muzyki. Wyglōndała mi łōna na takŏ jakosik ci niy za srogŏ, nō barzij maluśkŏ i kurduplowatŏ, wysztafirowanŏ nale ci bōła jak ficywyrt we Boże Ciało, we daklach miała ci łōna srogachne oringle, barzij ale ze takigo trōmpyjtngoldu, wyblanszowanŏ na fest a na fresie miała ci łōna pucu tela, coby szło niym łobciepać, zapucować cŏłki sztok tyj chałpy we kerym bōła ta Europa. Ku tymu, tak mi sie zdało, bōła ci łōna jesce ryżawo, nō takŏ choby pojscanŏ słōma, a wosy miała ci rozkociymbane jak to terŏzki je we mōłdzie. Zdała mi sie tyż niy takŏ blank modŏ. Prziszŏł ōłber, łobsztalowŏłech piyrszy lampus kōniaku, szluknōłech i dalszij kukōm po wszyjskich naobkoło. Wleźli dwie starucne mamzele i jedyn świdraty karlus (ta frela wele muzyki tyż cheba bōła deczko świdratŏ), przi jednym tiszu trzech chopa i dwie ino baby (niy bóło sie co gowy zawrŏcać), deczko dalszij jedna gryfnistŏ frela i trzech zramolałych knakrōw (pewnikym pitli ze roboty ze tōm frelōm i zdało sie łōnym, co Pōnbōczka za szłapy łobłŏpiyli), nō i yntlich muzyka napoczła grać take kōnski do tańcowaniŏ. Jŏch łobsztalowŏł jesce jedyn lampus, wartko go wysłepŏłech i... Wiycie, ta baba wele tyj muzyki zdała mi sie niy takŏ juzaś starŏ. Dziywka to możno już niy bōła ale werciōło sie jesce rōłz na nia kuknōńć. Łobsztalowŏłech jesce jedyn lampus, wysłepŏłech go na eks, przifilowŏłech ta corŏzki modszŏ frelka kole tyj muzyki. Lica ci łōna miała take czyrstwe, wosy aże do pōłrzitkōw a ze dekoletu wyglōndali blank sztramske cyculki... Jesce jedyn lampus kōniaku, i jesce jedyn na eks... Nōōō, blank szykownistŏ ta frela wele tyj muzyki. Takŏ blōndina choby Claudia Schiffer abo Pamela Anderson tela, co deczko łod nich modszŏ. Niy szczimŏłech i wysłepŏłech jesce dwa lampusy kōniaku I już takim łostrym weźrokym filuja po tym restaurancie... zmustrowŏłech wszyjske baby i ta, wele muzyki (jake łōna miała gryfne goldowe i brilantowe zausznicki) zdała mi sie gynał na dzisiyjszy wieczōr. Szluknōłech łōsmy lampus kōniaku... i jesce jedyn i... ida napytać jō do tańcowaniŏ. Ludzie! Łōna stanōła... te szłapy dugaśne aże ku ziymi... nō Naomi Campbell! Tańcujymy, tańcujymy i tak po pŏruch kōnskach (szluknōłech jesce jedyn lampus kōniaku śniōm) wylandowali my ci u nij we chałpie. Dalszij Wōm niy byda łozprawiŏł dokumyntnie. Styknie co rzykna, iżech sie łocuciōł blank ło rozwidnioku (nō, możno kole dwanostej we połednie) we skiełtanych hadrach na prykolu u tyj rubyj, świdratyj, ryżyj, wysztafirowanyj jak ficywyrt we Boże Ciało i wyblanszowanyj krapyki, ftoryj gybis leżŏł wele na nachtiszu! Ludzie! A mie już za pierōnym starego piyrwyj tuplikowŏł mōj starzik Jōłzel: – Ojgyn! Dej se pozōr! Na świycie niy ma żadnych, brzidnych i szpatnych babōw... moge być ino... za knap ze gorzŏłōm! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|